اضطراب الشخصية النرجسية – كيفية التعرف عليه  التعامل معه

شخص شايف انه عمله نادره ومفيش منه اتنين وعنده شعور بالاستحقاق مبالغ فيه، شايف نفسه اكتر شخص فاهم وما بيغلطش ومفيش منه اتنين فى الدنيا .

الشخص ده لا يقبل النقد، مش بيعرف يتعاطف مع حد، بيغير من اى حد ممكن يلفت النظر وياخد الانظار منه، بيخاف على شكله وسمعته اللى صنعهم من وحى خياله، مش بيشوف اى حد ذكى لانه شايف انه اذكى انسان فى الكون .

لكن الحقيقه عكس كده خالص هو مش حاسس بأي رضا عن نفسه وما عندوش اي تقدير لذاته وشايف نفسه قليل من جواه ومحتاج يثبت نفسه باي طريقه زي الصوره اللي انتو شايفينها قدامكم دي من قدام حاجه ومن ورا حاجه تانيه خالص كذالك بردو هو من جوه حاجه ومن برا حاجه تانيه خالص .

• النرجسى ممكن يهينك ويستخدم معاك الصمت العقابى لكن مش هيسمحلك تغضب .
• النرجسى ممكن يهملك ويهمشك لكن يطلب منك تتمسك و تهتم بيه بدون مقابل .
• النرجسى هيغير منك وممكن يكون مش بيحبك اصلا لكن بردو مش هيسمحلك تمشى .
• النرجسى مش هيهتم بيك ومش هيغير عليك لكن هيرفض يشوفك مع غيره وهيبقا عايزك جمبه .
• النرجسى هيبهرك النهارده بمدى اهميتك عنده وبكره هيحسسك انك لا تعنى ليه اى شئ .
• النرجسى هيرمى كل اللوم عليك و يوصلك احساس بالنقص و بتأنيب الضمير، هيرمى مسؤلياته، مش هيعترف بغلطه، وهيستغلك، هيرفض نجاحك ويحسسك ان اى حاجه بتعملها مالهاش اى قيمه .

غالبا الشخص النرجسى بيدور على الشخص الاعتمادى لان الاعتمادى بيحط احتياجات اللى حواليه قبل احتياجاته وده بيدى النرجسى السمع والطاعه وده بيشبع احتياجاته النفسيه زى القوه والتميز وانه شخص مهم .

خلى بالك اوى من الشخص النرجسى لانه ممكن يبهرك فى الاول لكن مع القرب والتعامل بتكتشف قد ايه هو انانى ومدى الاذى النفسى اللى ممكن يسببهولك .

التعامل مع النرجسى

• ناس كتير بتسأل ازاى تتعامل مع الشخصيه النرجسيه وهل ينفع علاجها ولا لا ؟؟

فى البدايه لازم ننتبه ان اللى يحدد الشخص عنده اضطراب الشخصيه النرجسيه هو متخصص فمحدش يحكم على حد انه نرجسى من بوست ولا سيرش .

• هل ينفع علاج اضطراب الشخصيه النرجسيه ؟؟

اى اضطراب ينفع يتعالج اذا الشخص شايف ومعترف ان عنده مشكله محتاجه مساعده لكن الشخص النرجسى شايف ان عنده حق ومش بيغلط ف فى الغالب الموضوع بيبقا صعب .

ازاى نتعامل مع النرجسى

اول حاجه لازم تعترف لنفسك انك موجود و شخص رائع وتستاهل الحب والاهتمام علشان تحافظ على نفسك من الاكتئاب والعزله وفقد الثقه فى النفس .

• حافظ على تقديرك لنفسك من خلالك انت .
• تقدير الذات بيجى من جواك مش من اللى حواليك لكن بعض الناس بتستمده من اللى حواليهم فلما تحتاج لتقدير متلجأش للشخص النرجسى ولا تنتظره منه لانه مش هيعمل ده .
• اقبله زى ماهو لو هو شخص مهم ليك اب او ام او زوج زوجه بطل تطلب منه مساعده او اهتمام لانه عاجز عن تقديم ده ومش هيحققلك اى شئ بالعكس هتحس بالاحباط والعلاقه بينكو هتسوء اكتر
  يعنى لو صاحبك نرجسى بلاش تقوله مشاكلك الخاصه لانه مش هيعرف يتعاطف معاك وهيغير الموضوع لحاجات تخصه هو .
• حط حدود لنفسك ووضحله الحاجات اللى مش هتقبلها وان كسر حدودك نتيجته مش هتكون كويسه، النرجسى بيخاف على صورته وضحله ان صورته هتتهز لو مستجابش ليك ولو حسيت ان مشاعرك بتتغير من ناحيته اعترفله بده بدون قلق او احساس بالذنب .

ممكن اللى حواليك ميفهموش الاذى اللى حاصلك من النرجسى خصوصا لو كان زوج لان فى الغالب مش بيكون فى مشاكل واضحه لان اللى بتحسه من تهوين وتقليل وازدراء مش هيشعر بيه اللى حواليك فمتعتمدش عليهم .

وانت بتتعامل مع النرجسى خليك فاكر ان شعاره فى الحياه «انا أولاً» علشان كده حتى لو كنت بتثق فى النرجسى هو مش هيدى قيمه للحاجات اللى بتشاركها معاه وممكن يستخدمها ضدك فى يوم من الايام فخليك حذر .

خليك فاكر ان النرجسى مش هيفهم ولا هيهتم بالحب غير المشروط وكل اللى هيهمه النفع اللى هياخده من ورا الحب ده وده لانهم بيكرهو نفسهم ومعندهمش اكتفاء من جواهم .

فى كل الاحوال الشخص النرجسى اللى فى حياتك ممكن يكون فيه حاجه واحده على الاقل حلوه او فيها انجازات بيفتخرو بيها فركز فى مدحك على الحاجه الحلوه دى وسلط الضوء على الميزه اللى فيه لصالحك انت وده هيبقا تنبيه ليك بحاجه حلوه ليه علشان تحتفظ بيه فى حياتك .

لما الشخص النرجسى يتكلم اديله مساحته فى الكلام وجاريه فى ذكر مميزاته وبعدين وضح عيوبه بشكل غير مباشر علشان تتجنب الصدام معاه خاصه لو كان زوج او اب او مدير او صديق عزيز .

• النرجسى بيحاول يقلل من اللى حواليه ومش بيعترف بأخطاءه فإحذر انك تقلل من نفسك علشان ترضيه .
• حسسه بالحب والاحترام من ناحيتك وانك مصدقه علشان يعتبرك من اصدقائه مش اعدائه .
• حول الكلام لضحك وهزار لو هتتكلم فى مشكله لانه مش بيقبل النقد بسهوله .
• افتكر دايما ان النرجسى شخص فاقد الثقه الحقيقية فى نفسه من جواه وده بيخليه محتاج مدح كتير من اللى حواليه علشان يظهر نفسه فحاول تحس بالشفقه ناحيتهم وده مش معناه تسيبه يعمل اللى هو عايزه لكن انك تفتكر انه انسان تحول لنرجسى و مش عارف يتعامل مع اللى حواليه غالباً بسبب الاباء النرجسيين .

فى النهايه لو حسيت ان التعامل معاه يفوق قدرتك وبيسببلك اذى سواء نفسى او بدنى الافضل انك تقطع علاقتك بيه وتهرب فورا ولو شخص مينفعش تقطع علاقتك بيه حاول تتعامل معاه فى اضيق الحدود وتتجنبه تماما وتركز فى حياتك بعيد عن الشخص ده .

#اضطراب_الشخصيه_النرجسيه

#زينب_ابراهيم

#المؤسسة_النفسية_المصرية