مشكلة العناد عند الأطفال – أسباب وحلول للآباء وكيفية التعامل مع الطفل العنيد فى خطوات محددة

العند مش سلوك مكتسب ده مرحله طبيعيه كل الاطفال بتمر بيها وبتبدأ فى عمر سنتين لكن ده مايمنعش ضروره التصرف معاه بشكل سليم علشان ماتستمرش معاه للمراهقه وقتها التعامل بيكون صعب

الطفل العنيد والعصبى فى الغالب بيكون ذكى ونشيط جدا علشان كده من الافضل انك تتبعى معاه اساليب ذكيه فى التعامل

ابتعدى تماما عن اسلوب الامر المباشر حاولى تلاقى طريقه للمناقشه والحوار بينكو وتبعدى عن انك تديله اوامر طول الوقت واديله حريه التعبير عن مشاعره

التشجيع والمديح بشكل مستمر مهم جدا مع الطفل وهيوصله شعور بالامان والاتزان وتجنبى المقارنه تماما لانها هتزود العند معاه

اسمحيله ياخد قرار او يشارك فى اتخاذ القرار على الاقل

انزلى لمستوى طفلك واتكلمى بهدوء واستخدمى الكلمات المحببه عنده وماتحاوليش استخدام اسلوب الاجبار معاه

اسمعيه واديه فرصه يتكلم و يعبر عن مشاعره بدون ماتقاطعيه او تجاديله
كلميه على مشاكله فى البيت والمدرسه وفكرى معاه ازاى تحلوها واسمعى رغباته واحترميها

الصبر معاه مهم جدا جدا جدا وبلاش التسرع فى العقاب او الضرب نركز اكتر معاه على الحوار والمناقشه

لما تلاقى طفلك بيعند جدا بلاش توتر وعصبيه معاه لكن ممكن تنسحبى لحد مايهدأ وتفهميه ان انسحابك مش ضعف لكن مش هتقبلى التعامل بينكو يكون بالغضب والعصبيه وهترجعو تتكلمو تانى بهدوء لكن تجنبى انك تغضبى لان ده هيزود عناده اكتر

لو كل الاساليب دى منفعتش ممكن تستشيرى مختص علشان يساعدك فى تعديل سلوكه

(المراهق العنيد)

“التعامل مع المراهق العنيد ”

المراهق مابقاش الطفل الصغير اللى كنت بتتعامل معاه علشان كده ضرورى انك تشركه فى القرارات المهمه اللى ليها علاقه بالبيت ده هيعلمه تحمل المسؤوليه والمشاركة فى القرار وبالتالى هيزود ثقته فى نفسه

خلى بالك وابتعد تماما عن الانفعال مع عناد المراهق لان فى المرحله دى المراهق مابيقدرش يسيطر على غضبه وممكن ياخد قرارات مش فى مصلحته ابدا فالافضل انك تهدى وتهديه وتتناقشوا فى الموضوع كأصدقاء

عناد المراهق مش بيجى من فراغ ده بيبقا بسبب رغبته فى الاستقلال وان يكون هو اللى متحكم بعيد عن رغبات اسرته واللى بتكون رغبه طبيعيه جدا لاى حد فى سنه علشان كده نحاول اننا نقترح معاه حلول وبدائل لاى موقف بيواجهه علشان يتعلم القياده صح وحسن اتخاذ القرار

بلاش تفضل طول الوقت مركز بس على اخطائه وسلبياته وتتجاهل الايجابيات من وقت للتانى اتكلم عن ايجابياته وامدحه ده هيزود تقديره لذاته وهيحس بالقبول

كلفه بمهام فى اشياء بيحبها ده هيخليه يتحمل المسؤليه ويفهم قيمه واهميه العمل وهيزود نشاطه

فى بعض الاوقات ممكن المراهق يلجأ للعند ك رد فعل لسلوك العند المُتبع معاه من احد الوالدين علشان كده ضرورى نتجنب اسلوب العند معاه ونستخدم الحوار والاقناع والمناقشه

بلاش تحكم عليه لانه فى المرحله دى بيكون بيكتشف هويته فبيجرب حاجات كتير جديده بلاش تتريق عليه وتحبطه انت ممكن ترفض الانشطه الجديده او لبسه او اهتماماته لكن تجنب انتقاده
#معلومه_تربويه
#زينب_ابراهيم
#المؤسسة_النفسية_المصرية_EPF